一年前，街機版《北斗之拳》登場，名氣雖大，可惜2D格鬥喺機舖嘅風潮實在低落，本港更只有少量機舖入貨，搞到冇乜人知道出咗街機版。查實世嘉做呢隻Game幾有心機，人物角色夠巨大，尤其拳王雷奧，簡直逼爆畫面咁滯，相當之有氣勢同迫力，未打已經俾佢嚇親！
錯過咗？唔緊要，事隔一年，終於移植至PS2，呢款名為《北斗之拳：審判之雙蒼星拳豪列傳》嘅格鬥Game，100%移植街機版味道之餘，仲新加歷史模式，讓每個角色嘅經典場面重現，好似決戰南斗水鳥拳，北斗六車星，雷奧及拳四郎刀仔插腳互片等，真係打到興奮時，仲可以喺屋企大叫：「啊，打打打打……！你已經死了！」
值得一提係預訂遊戲，可額外獲得一隻特典影像DVD，入面收錄過往《北斗之拳》大部份遊戲版嘅影片，而且更有高手示範招式，不論係咪Fans都值得珍藏。
文：立月