中國、俄羅斯、巴西同印度等新興市場近年經濟蓬勃，股市更加水漲船高，美國散戶唔執輸，希望趕上車搵快錢。網友RachelLaura0507問：「點先可以投資中國同俄羅斯股市？」EnigmaticPumpkin答：「你如果冇乜揀股經驗，最好買入新興市場嘅『證交所買賣基金』（ETF），裏面有好多俄羅斯、印度同中國嘅優質股，基金仲有投資專家負責管理，啱晒業餘投資者，因為唔使煩嘛！」
買基金唔使煩
不過，MillertheLarge提醒投資初哥，「俄股舊年勁升七成，中國股市更翻一番，𠵱家一啲都唔平，入市高追，一個唔好彩遇着大調整，就有排坐艇。專家話，一味追求高回報唔係最好嘅投資策略。」
globalbiz亦認為投資新興市場要小心，尤其借港股作為投資大陸嘅平台，因為香港股市好敏感，一旦伊拉克局勢轉壞，或者廣東省有禽鳥死亡，引起禽流感恐慌，港股都難免會插水，真係少啲心血都頂唔順。
佢又話，雖然中國未來廿年內部需求會好大，但由於政府可能推出不利經濟嘅政策，加上中國企業透明度唔高、統計數字又唔係咁可靠，當地銀行亦可能出現借貸泡沫，有好多壞賬，所以投資中國股票有一定風險。
曾準確預測美國87年股災、並贏得「末日博士」封號嘅麥嘉華，最近講過：「新興市場未來3個月可能受創，我對買進俄羅斯、中國同印度股票會小心翼翼。」