港股早輪低位反彈，恒指噚日收報20769，累積升咗近1400點。散戶生番晒，網友小魔童更喺《公眾投資168綜合論壇》留言，話打算賣咗層樓，將啲錢買晒地產股。
槓桿作用 大上大落
佢從3個角度分析，首先講變現力（Liquidity），樓唔係話平就可以賣得出，喺01至04年就好體驗得到呢點，見過鬼都怕黑；其次係靈活性（Flexibility），買到一間好公司嘅股票，會不斷升值，又有息收，即使睇錯咗，亦可以改變投資策略，但買錯樓就好煩；第三係買賣成本（Overhead），買樓嘅成本重，通常係樓價一成，但買股吸引嘅地方就係槓桿作用，升起值嚟就好和味！
網友Catalina語重心長咁勸小魔童千祈咪制，「啲地產股升到咁高先嚟買，好危險㗎！喺呢個時候『瞓身』，隨時搞到『一瞓不起』。」Kkccho08亦係咁講：「賣樓係可以，但係以𠵱家個價買地產股，會唔會太進取呢？自己就冇咁大勇氣喺高位追貨，我睇嚟緊樓市個浪係升𠻹喎。」
家陣高追 遲咗啲噃
揸住地產股嘅網友空空和尚，亦都唔建議咁博，「股票應該係有閒錢先至買，我自己都有層樓，但斷唔會話賣咗層樓去買地產股囉！」網友難記電訊就提醒佢，小心連層樓都輸埋，變成雙輸。殘劍就講咗自己嘅經驗，「千祈唔好將賣樓同炒股兩樣嘢拉埋一齊講，我之前賣樓，係唔想咁重負擔，並非為炒股。」
長實（001）、恒地（012）、新地（016）、新世界（017）及恒隆（101），噚日分別收報105.8、47.4、98.75、17.56同21.15元，自踏入07年，股價已分別升逾8至12%。
大行雷曼兄弟喺17號，畀以上地產股嘅最新評級，恒地、新世界及恒隆已「到價」，而長實及新地就仲有18%上升空間，目標價分別係125.1元及116.2元。