六叔陳永陸話：「唔好同股票談戀愛」，偏偏網友Gilbertlck要將愛情同股票拉埋一齊，仲喺《香港討論區》發表咗一篇「愛情與股票相同的地方」嘅偉論。
佢認為「買藍籌，就好似搵一個最夾嘅人同你一生一世咁，買咗就唔需要放；放咗，你唔會買得番，而且一定後悔。只要有耐性等時間，回報極之可觀。」
對於二三線股，Gilbertlck就以拍散拖形容──「風險大好多，但亦刺激好多。唔排除有一日可能修成正果，但機會細得多，通常執笠機會較大。」
至於窩輪，比喻得仲精采──「買輪就好似一夜情，買之前你都已經知道同賭無乜分別，係會更刺激，更好玩，但你亦要預咗輸清光。十個有九個人會夢想過食硬，付出小就有高回報，但十個有九個都係輸硬。」
賭一鋪 無得計
Gilbertlck仲提醒話：「股票市場嘅大贏家，都係人棄我取，當人家最瘋狂嘅時候離開，人人看淡嘅時候入市；但愛情就唔好又玩人棄我取，會死人㗎！應該理解為，當伴侶好失落既時候，你要依舊對佢咁好，一起相伴等黑暗過去；對方極度風光，佢又依舊同你一起。即係可以共富貴，亦可共患難。」
不過，佢嘅結論係股票同愛情有一樣嘢唔同，「股票始終有得計，愛情係無得計（較）。」