金豬年快到，今年經濟環境好，《香港討論區》嘅會員笨小a早就問定，究竟各大銀行幾時有新鈔換？諗住換定啲直版新銀紙封利是。
理財版曾經搵過3家發鈔銀行，滙豐、中銀（香港）及渣打不約而同話，2月5日會有新鈔換；非發鈔銀行方面，東亞同恒生都話2月5日有新鈔換，因此可以預計，大部份銀行都會喺當日供應新鈔。
50蚊紙料搶手
由於今年好景，銀行界人士估計，50蚊新鈔會特別搶手，銀行都話擔心會缺貨，到時可能要限量兌換。不過，金管局早前已要求各發鈔銀行，繼續提供新鈔及高質素舊鈔畀市民找換。
順帶一提，人仔𠵱家已經貴過港紙，市民會唔會有兌換人民幣新鈔嘅需求？銀行話佢哋手頭上嘅人仔其實亦係嚟自客戶，因此未必會有人民幣新鈔供應，但亦會盡量提供高質素嘅鈔票畀客戶。佢哋仲話，如果有多啲人改換人民幣鈔票、特別係50蚊嚟封利是，或者可以減輕對港幣新鈔嘅需求。