警察新一哥上任，話要將香港嘅治安由好好搞到最好，成為世界最安全城市，可講得係其志可嘉，值得鼓掌。香港嘅治安已經非常唔錯，你試吓去外地旅行，晚上邊度有香港咁多人行夜街，完全唔怕畀人打劫、毆打、搶手袋㗎？唔少外國expats（海外僱員）嚟到香港，初時唔准十幾歲嘅仔女出夜街，住耐啲就放寬子女嘅「宵禁」，因為佢哋知道，香港唔係華盛頓也。
香港啲傳媒就頑皮咯，每有罪案發生，肯定做到大大，甚至上頭版，雞乸咁大個字，驚死讀者睇唔到。傳媒咁樣誇張法，係唔係嚇怕咗市民，令到大家冇安全感呢？冇噃，警方亦未鬧過傳媒破壞安定。廣州不同香港，就鬧媒體散播「不安全感」嘞，廣州市政法委書記、市委副書記，負責公安部門嘅張桂芳就話媒體造成治安問題迅速擴大化，影響了群眾的安全感，傳媒對治安有一份責任。
唔怪得之啦，三個月前有香港富豪上廣州開甚麼會議，其中一位坐私家車（有司機）在東方賓館附近被一架汽車碰撞，逼埋路邊，汽車上有人落車衝埋嚟，富豪知道係乜嘢一回事，急叫司機搏命倒車撞番出嚟，高速返回酒店，事後獎賞司機夠勇猛，而大人物不久後得到通知，立即親自慰問富豪，加多一句：「唔好宣揚，唔好報道。」富豪當然了解、同情，充份合作。返到香港後先至慢慢一個傳一個咁傳開咗。
今期香港電台出版嘅《傳媒透視》（二○○七年一月號），內有《經濟日報》編輯麥嘉瑋一篇文章：「記者的腳鐐解開了嗎？──香港記者學人重慶訪問團後的一點反思」，講○六年十二月中到重慶訪問，與當地司法機關及學者交流學習「傳媒與法制」。一位重慶教授話二○○六年十月一日，重慶發生一單幾十架汽車連環相撞嘅意外事件，適逢溫總理到訪重慶，所有媒體一律不准報道該車禍，到十月十六日先至解禁。香港記者聽咗，為之嘩然，但內地學者記者就認為十三億人吃飯是最重要問題，其他一切讓路，國家不能出亂子，香港記者不懂國情就沒資格批評內地箝制新聞自由。以咁嘅觀點，香港報紙日日都破壞七百萬人嘅飯碗，兼夾影響治安！