02年底由政府同會計界發起話要搞嘅財務匯報局，舊年7月至獲得立法會批准成立，個行政總裁歷經4個月尋尋覓覓，終於由我哋擺到明準備競選連任嘅24小時特首宣布，由已經響03年10月退休嘅庫務署前署長沈文燾出任。呢個局專門負責調查香港上市公司嘅核數不當行為同埋會計違規事宜，而沈生服務政府25年，專門負責管政府庫房嘅事，由佢出掌呢個位應該係最佳人選。
雖然2月1日至生效，而且任期3年，政府話沈生首要任務係將個局搞出嚟先，但阿沈總裁好心急，今日就準備茶點，同新聞界見面，飲啖茶食個包之餘，唔知阿候任行政總裁會唔會話過我哋知，邊單問題上市公司混賬case，會係佢哋第一個開刀對象呢？會唔會係個大股東仲響大陸，至今都唔肯番香港嘅海域集團個案呢？