星洲「姿整」國父向香江出招！李光耀上星期六向外電放風，話新加坡政府計劃調低公司利得稅，由現時20%減至少1%，同香港嘅利得稅17.5%鍊過，誓要爭多啲外資咁喎。
不過，全國政協常委陳永棋噚日喺本港出席河南招商推介會時，就向港人大派定心丸。佢話，雖然呢招係衝住香港而嚟，但實際影響唔大，因為香港背靠內地，賺錢機會多過人，而本港現時利得稅亦已經好低好低，但真係有必要嘅話，佢認為都可以「象徵式」調低0.25%。
恨到隔籬流口水
陳常委擺明唔放人哋喺眼內，但又好難怪嘅，事關香江有阿爺照住，至今已有350間內地企業嚟香港上市，集資額超過1800億美元。單係噚日嘅推介會，河南同香港雙方簽嘅合同，總值就有69億美元，當中港企佔資23.9億美元，咁大單刁，怕且係人都會恨到流晒口水啦。