「細」風日下，「意西」沉淪，話說英超嗰邊鬥到火紅火綠，淨係周日阿仙奴尾段反勝曼聯2:1已經精采絕倫。點知西甲聯呢周竟然10場波開足9場「細」，仲要開足4場0:0，悶到極點；意甲都不遑多讓，10場聯賽又開咗7場「細」，搞咩呀？
得巴塞國米「大」得起
睇番西甲上輪聯賽數據，10場波計埋計埋，有成13支球隊冇波入，咁搞法唔開足9場「細」都好難。唯一嗰場西甲開「大」，就係好鬼正氣嘅巴塞隆拿喺周日主場大勝塔拉戈納3:0重上榜首，幫球迷開個熱爆嘅1.48倍「主勝」同1.5倍「大」。
呢期巴塞好「弗」嘅前鋒沙維奧拿終於有正選打，仲入咗1粒開埋「首球」；連埋中場古利同恩尼斯達嘅入球，啱啱湊夠數開「大」。原來沙維奧拿唔經唔覺近4場已經入咗7球，抵佢可以吐氣揚眉，仲有機會續長約嘅。
意甲嗰邊雖然冇西甲咁誇張佔9成開「細」，但呢周都有7場以「細」波膽收場。好彩國際米蘭同巴塞隆拿一樣咁正氣，同喺主場以3:1擊敗費倫天拿開「主勝」。不過捱眼瞓睇深夜場拉素對AC米蘭嘅球迷就慘喇，結果又「細」開0:0完場。
「西甲歇冬後球隊好似跌晒watt咁，睇見勁旅西維爾3場不勝就知；我求大俠建議波友叠埋心水睇英超好過，話晒都起碼場場好波吖。」