現年66歲的余慕蓮(魚毛)從影57年,已厭倦扮演垃圾婆等丑角,日前宣布3月1日退休,但她心中一直希望可以破格拍咀戲,導演張堅庭得悉後,有意在新片《合約情人》中安排男主角任賢齊錫魚毛,為她圓夢,魚毛對此興奮莫名,未知小齊可是同樣心情?
余慕蓮效力無綫多年,幾乎成為各劇集中的御用垃圾婆,扮足37年,成為「丑角」icon,她愈做愈心淡,所以打算3月1日約滿無綫後就正式退休,享受人生。退休前,魚毛上周為時裝設計師鄧達智的時裝騷行天橋,自信心爆棚之餘,她還自爆希望可以嘗試拍咀戲。
度身訂做角色
魚毛恨拍咀戲的心願見報後,導演張堅庭即有意替她完成夢想,他3月會執導由任賢齊和范冰冰主演的喜劇《合約情人》,阿庭昨日表示可以在新片中為魚毛度身訂做一角,他說:「我一路都好欣賞魚毛嘅演技,佢扮啲小人物好入肉,如果佢有興趣,我都想同佢合作,仲可以完成佢恨拍咀戲嘅夢想。我初步打算加插一幕小齊錫魚毛塊面嘅搞笑戲。」
小齊:會盡力
魚毛昨日在電話中聽到阿庭有意找她拍戲,即興奮地說:「我梗係想試吓,拍唔拍咀戲都冇所謂,我抗拒拍嘴對嘴戲,錫面就接受到嘅,不過我反而擔心小齊會介意,只要角色有發揮就得。坦白講,我好厭倦無綫成日只係畀我扮垃圾婆,拍到好冇癮。」
任賢齊於電話中回應說:「嘩!係咪真㗎?我都未收到詳細劇本你哋就咁快知道?作為演員,我會跟從導演嘅要求去做,如果有呢一幕我會盡力做好。我仲要多謝佢咁睇得起我,覺得我係一個靚仔,希望到時大家合作愉快啦﹗」
此外,阿庭5月還會搞慈善英語舞台劇,他說:「我搞呢套英語舞台劇係想鼓勵大家多學習,如果魚毛肯客串,正好可以帶個訊息畀年輕人,學英文係無分年齡,做到老學到老。」
採訪:比華利