過去數年，美國三大車廠一直受到來自日本過江龍咄咄進逼，豐田汽車去年12月更成功突圍，超越克萊斯勒（Chrysler）成為美國銷量第三高嘅車廠。舊年動作多多嘅通用及福特汽車，今年到底能否保住江湖地位呢？
網友antijunk喺《MSNBC》討論區就向美國車廠大潑冷水，「通用同福特喺07年嘅表現，同05、06年應該都唔會有咩分別，都係繼續處於捱打狀態，市場佔有率應該只會一路再跌；除非佢哋突然大徹大悟，識得生產優質可靠又慳油嘅車款，但呢個可能性極低。」
款式老土價錢貴
Luc8認為：「美國車嘅致命傷係車款太老土啫，換過晒啲設計咪有救囉！」bgatts就話：「要贏人先要贏自己，美國車啲款式唔入流之餘，價錢仲賣得咁貴，我睇都好難博得顧客嘅歡心。」
據美國雜誌《ConsumerReports》去年底進行嘅調查顯示，受訪嘅900多名美國人之中，有四分之一話最想買嘅新車款，都係嚟自豐田旗下嘅系列。調查又發現，24%受訪者話下一部要買嘅新車牌子係豐田，17%想要日產汽車；至於會買「國貨」通用雪佛蘭（Chevrolet）同福特汽車嘅，分別只有15%同13%。現時擁有豐田汽車嘅車主中，78%話想再買多部豐田。
為與勁敵豐田爭霸、保住一哥地位，通用汽車去年不惜裁員同關閉廠房減省開支，今年喺北美國際汽車展中，又宣布研發可大規模生產，及可以用極少汽油，甚至唔使油推動嘅電動汽車。福特不甘示弱，亦宣布推出最新環保汽車。到底美國兩大車廠出招反擊有冇機會收復失地，真係要拭目以待。