香港地真係卧虎藏龍，𠵱家啲股票升到嘭嘭聲，炒股好過炒樓。股海浮沉，血淚斑斑，怒氣沖沖嘅故事真係藍田排到荃灣。噚日拖欠員工薪金嘅老牌報紙《成報》，其控股上市公司星美出版集團舉行股東大會，一名60歲嘅阿婆股民，就公開佢買股票嘅過山車生涯；對《成報》，佢條氣仲好唔順。
60歲自稱小股東嘅高瑞華，不惜遠道由尖沙嘴去到筲箕灣《成報》辦事處，出席股東大會。佢喺陽光文化入主《成報》嘅年代，就持有約值兩萬蚊嘅股票。陽光文化後來將《成報》轉手賣畀𠵱家嘅星美，點知星美一停牌就唔見天日，股價仲變成仙股。噚日睇見港股又再創新高，高婆婆條氣梗唔順啦。
對傳媒股情有獨鍾
呢位高婆婆，經歷過73年股災，多年嚟喺股壇打滾，見過唔少風浪。試過失手買過八佰伴、百富勤、明珠等股票。佢喺股壇曾經輸過錢，亦同樣贏過錢，例如最近嘅建行就執過錢，對傳媒股更加係情有獨鍾，手頭上仲同時持有星島嘅股票，但佢始終唔肯講，咁多年嚟，究竟贏輸幾多錢，只肯話佢係組合投資嗰類股民。
高婆婆噚日出席股東大會，主要係睇到《成報》近年因拖欠員工薪金而頻頻見報，覺得打工仔搵兩餐都好艱難，如果仲冇糧出就更加慘，批評班《成報》管理層，出唔到糧自然留唔住人才，份報紙唔會做得好。佢話免費報紙都賺到錢，點解賣六蚊份嘅《成報》賺唔到錢？
「股神」高婆婆收到通知開股東大會時，打電話問過開股東大會有冇茶點供應，點知接線生話《成報》冇錢賺，會上只有支水飲，你話係咪激死！高婆婆話，人哋公司股東會唔止有飲有食，仲有禮物送，起碼都有年報派，《成報》就欠奉。佢最希望《成報》有機會同人合股或者賣枱，以便再次復牌，令仙股嘅股價升番一個仙，咁就可以出貨脫身。
主席話唔想隻船沉
高婆婆引述股東會上有一名姓黃嘅主席話，《成報》300幾名員工，只有幾個員工追討欠薪，有大股東每個月出300幾萬蚊，都係想解決問題。無論大股東同小股東，大家都係同坐一條船，唔想隻船沉。