世事常變，變幻才是永恒。估不到踏入07年就有唔少轉工消息，今次係公用股明星級分析員、瑞銀亞洲公用股分析部主管兼執行董事許淑芳（圖），佢會離開瑞銀，但就冇講會去邊同埋離開原因，不過𠵱家個市咁hot，以Alice嘅級數，真係去邊度都做得阿頭有餘！
一出報告見異動
講過Alice，叫佢做明星級分析員真係一啲都唔算誇，好似中電每年公布業績，都會頒個獎畀盈利預測數字最近嘅分析員，聽講Alice就攞過好多次，仲要係好近嗰隻。仲有，逢親Alice出報告，嗰隻股就一定會有異動，差唔多寫嗰隻升嗰隻。呢啲咪係眼光囉！
Alice除咗好有星味之外，佢仲好勤力㖭。佢每年除咗一定會出席大大小小嘅分析員會議外，仲會去埋記者會，務求掌握所有資訊，令佢嘅分析更全面。Alice，祝你前程錦繡！