舊年唔少散戶追捧新股，部份抽中一兩手嘅寧願放喺櫃桶底長揸，希望成為下一隻滙豐（005）或者國壽（2628）。不過有網友喺《雅虎討論區》求救，話唔見咗張株洲南車（3898）股票，唔知點算好。
承惠$4600 等足4個月
網友eric2004話佢舊年唔見咗國壽股票，要去「中央結算」（應該係中央證券）報失，結果要畀差唔多4400蚊廣告費、200蚊服務費，同埋兩個半登記費，加埋要成4600幾蚊，「唔見咗張股票，結果浪費時間辦理手續之餘，亦勞神傷財。」好彩國壽愈升愈有，如果𠵱家仲企喺招股價，就算攞番張股票都補唔番成本。
家陣電子時代，散戶如果真係遺失或損壞咗實物股票，要去公司過戶處辦理手續（現時大部份公司嘅過戶處為中央證券登記公司，包括株洲南車），可登入中央證券網址www.computershare.com.hk，下載一份「補發申請書」表格（見圖），填寫基本資料、補發股份名稱、股數及簽署後，郵寄或直接遞交中央證券辦事處，地址為灣仔合和中心46樓，或傳真至28650990/25296087。
大約一星期後，中央證券會寄信通知，在繳交證明文件及支付補領費（收費按個別情況而定）後，就可獲補發一張新嘅實物股票，舊嘅股票會被註銷。由於過戶處會於補發報失股票起14日內刊憲，股票市值不超過2萬元亦需分別在1份英文及1份中文報章刊登，因此要收番廣告費。
喺《Uwants討論區》，網友講到若同時間有幾個人報失，就可以攤分廣告費；若只有一人報失，苦主可選擇等多幾個人先一齊登廣告，咁即係遺失實物股票，都要等齊人先至好唔見！
至於幾時先攞得番啲股票，中央證券話，第一次見報後16個星期就得，即係要等足4個月。如果喺呢段時間股價有乜冬瓜豆腐，真係喊都冇謂。