煲呔競選辦同埋東亞銀行港灣大廈地下大堂，盛載咗唔少行家嘅集體痛苦回憶，煲呔兩年前嘅競選總部都喺呢度，當時啲行家由朝到晚喺樓下，做人肉閉路電視，既冇得坐，又要俾態度惡劣嘅保安驅趕，但估唔到今年仲多咗條惡例：唔准喺大堂飲食，連飲啖水都唔得！有行家認為呢招太不近人情，唔知理據係乜？如果怕整污糟地方，證據何在？
啲行家由朝等到3點幾，先見到着住中山裝嘅煲呔嚟。煲呔學傑哥用袋巾，仲要揀傑哥嗰隻粉紅色，但佢開完會落嚟，條袋巾好似變魔術咁，其中一忽染咗做藍綠色，甚有對戰嘅味道，唔敢輕敵喎。
競選辦噚日開幕，秘書長許雄話，佢哋冇切燒豬慶祝，𠵱家連卡片都未印，但就冇答有冇睇過風水喎。