已經42歲嘅吳啓華，03年因為被傳媒拍到北上尋歡，搞到事業插水，師奶殺手形象蕩然無存，被迫轉戰內地市場。但塞翁失馬焉知非福，吳啓華近年喺內地發展唔錯，經歷過婚姻失敗同多次感情挫折嘅佢，仲搵到第二春㖭！
噚日馮仁昭喺金鐘婚姻登記處，見到啓華同年僅21歲嘅演員女友石揚子已經排期註冊，準備月內迎娶女友，證明佢已經修身養性，叠埋心水做老襯！
其實吳啓華舊年11月喺內地《舞林大會》已當眾向石揚子求婚成功，噚日馮仁昭諗住打電話恭喜佢，點知call極佢都冇回覆。聽聞吳啓華會喺香港註冊，喺北京擺酒，現階段佢已經搵人擇緊好日，希望農曆新年前擺酒，但未知訂唔訂得切酒席。而佢前女友金巧巧噚日知道啓華排期結婚之後，以普通話回應：「我會發短訊或致電恭喜他，衷心祝福他找到幸福。」
歌神愛將嫁經理
唔單止吳啓華，噚日馮仁昭仲見到曾經被Ba叔陳達志力捧、喺歌神許冠傑演唱會表演過嘅侯莎莎排期結婚㖭！23歲嘅侯莎莎，與報稱做項目經理、住喺深圳嘅同齡男友申景排期註冊，雖然Ba叔惹上官司之後，侯莎莎嘅事業搞到唔湯唔水，但搵到有情郎，都算可喜可賀！
