大藍籌股氣勢如虹，恒指大升444點，收20772，再創新高。上一個浪，由中資股做火車頭，今個浪就由大藍籌接力上，恒指上升目標係21200至21500；不過，中資股依然要睇好，唞完氣之後，H指一樣可以創新高。
上升股（唔計認股證）有540多隻，頭50大上升股，升幅由159%至9.7%，全部都係二三四線股仔，百花齊放大氣候下，仲有好多寶藏未見光。
位元堂（897）收0.35元，升2仙，升幅6%，連續兩日都有近8000萬股的大成交，動力明顯轉強。位元堂上月底曾高見0.45元，唞咗近1個月，噚日升勢再起，只要突破0.37元嘅降軌阻力，新升浪就可確認，照度上去，短線上升目標係0.62元，在0.37元樓下上車，上升空間有成60%，有得諗。
本年度可望虧轉盈
位元堂主要產銷中西藥同保健食品，雖然仲係蝕緊本，但經營情況係明顯在轉好中，買股票睇前景，一家公司度過低潮，由谷底回升，股價亦好有機會出現強烈反應，脫胎換骨。位元堂發行約14億股，市值只4.9億元，藥業股呢輪有追捧，位元堂更應望多兩眼。
先睇番盤數，05年度（3月年結），虧損6795萬元；06年度又蝕9837萬元；到07年度的上半年，虧損大幅減至531萬元，全年應可恢復盈利，估計可賺千多萬元；下年度，盈利更可望達到4至5千萬元。
集團在香港同內地有零售店53間、特許經營店18間，係香港最大型的中藥零售連鎖店；另外，集團擁有九龍灣宏光道的位元堂大廈，以及九龍彌敦道兩個冧巴的舖位及閣樓全部權益。
06年9月底，位元堂股東資金6.4億元，每股NAV0.46元，計入物業增值之數，每股NAV可上升到0.58元，P/B0.6倍，零售股P/B通常都好高，2至3倍等閒，位元堂偏低，好吸引。
內地係位元堂主力拓展的市場，現時在珠三角已建立零售網，下一步係長三角地區，預計在未來一兩年開店50至100間，由於租金和人工廉宜，毛利率高，可帶動盈利急速增長。
郭兆誠