睇完星期日阿仙奴戲劇地反勝曼聯，唔洗諗，點都要阿仙奴聯賽盃客勝熱刺啦！
「兵工廠」自從亨利踢完世盃之後，要休息一段時間先比賽，缺少呢位大哥，隊波無乜點走樣！成績下滑，只因年輕球員，以及我極喜歡嘅捷克「發電機」路斯基，缺英超經驗，𠵱家過咗幾個月，雲格年輕化及鐵血政策開始修成正果。
雖然阿仙奴周中作客熱刺，但亨利加埋尹佩斯（編者按：尹佩斯受傷缺陣6周），一個經驗夠，一個活力十足，點頂得住？儘管主隊有廸科爾同貝碧托夫，論級數，已經高下立見！不過，加埋中前場，熱刺打主場嘅氣勢應該可以搏吓，輸少啲！
另一場聯賽盃，車路士次回合對韋甘比，上次被對手偷雞得手，車仔狀態雖然下滑當中，但就算無泰利，大家都可以放心支持，小勝對手！另外，布力般繼續係我嘅提款機！上場輕鬆搞掂曼城後，對住屈福特，仲容易踢，客勝無問題！
周鵬
商業1台《球迷集中贏》主持
電郵：[email protected]