恭喜！恭喜！今日，孫柏文首先想恭喜因湊女忙碌，而讓咗篇幅畀我嘅《利字當頭》一欄總舵主利世民兄。恭喜佢同阿嫂喺禮拜日添丁！
噚日朝頭早，我打電話畀利世民恭喜佢嘅時候，佢仲話，雖然特區政府上個禮拜先至出口術話要打壓啲祖國大肚婆，今個禮拜陪老婆去醫院生仔，已經見唔到有祖國嚟嘅大肚婆。唔通特區政府變成聯儲局或日本央行，一出口術就見效？
我仲記得上個禮拜寫咗一篇文章，話因政府會打壓啲祖國大肚婆，不過又唔會即時實施，所以會見到大批大批嘅大肚婆喺實施限期之前蜂擁來港。不過，如果利世民兄嘅經驗，唔係個別事件，咁就真係好在嗰篇文章嘅題唔係《一注獨贏買大肚婆湧港》。
唔發牌就唔使孭鑊
講番正題，孫柏文噚日睇到一篇關於一間食肆無牌經營嘅新聞報道。嗰間食肆名叫「板前壽司」，係一家連鎖式日本餐廳。
無牌經營嘅分店，位於旺角登打士街柏裕商業中心家樂坊一樓。呢間「板前壽司」，聽聞人頭湧湧、生意滔滔，根據基本市場經濟學，啲嘢應該食唔死人，甚至可能好好食。不過，唔知道點解，政府遲遲未發出牌照，等佢可以有牌經營。其實，無論係食肆或酒吧，甚至舞蹈學校，發牌制度根本已經去到擾民嘅地步。
呢啲發牌條件，往往出於保護消費者嘅出發點而制訂，不過，今時今日已經去到就連消費者都覺得討厭。我曾經多次話過，官僚唯一考慮係會唔會「孭鑊」，唔發牌就唔需要「孭鑊」。
官僚最想見到嘅香港，就係冇酒吧、食肆嘅香港。大家都知道，我哋嘅家、我哋嘅香港，飲食文化扮演一個非常重要、肯定我哋身份嘅角色。
好多因為官僚唔發牌而消失嘅食肆，往往就係因冇牌而從此從我哋嘅集體回憶中消失。大家如果曾經參與過「保護天星」或被保護人士嘅行動感動過，今次就要來一次轟轟烈烈嘅公民抗命。
原先，今日呢寫篇文章，絕對唔需要將該分店嘅地址完完整整重複一次，不過，今日孫柏文就係希望大家可以跟住地址去嗰間分店，幫襯佢哋。保護集體回憶，你同我都有責任，大家不如挺身而出去食（柏裕商業中心嘅）板前壽司！
噚日同尹思哲兄講起呢單嘢，佢都覺得為咗公民抗命（柏裕商業中心嘅）板前壽司值得支持，所以我哋已經訂咗枱，呢幾日之內就會去。如果有緣，希望見到大家！
金手指網誌：
http://phatdat.blogspot.com