IT界從來都係快人一步理想達到，乜都講快講update，一日豈止千里，真係估唔到會咁身體力行，連劈炮速度都相當驚人！講緊係中國嘅科網高層，繼微軟兩件高層人物、Google大中華區嘅銷售暨業務總裁周韻寧相繼上任後極速鬆人之後，又一IT界舉足輕重人物加入快閃黨，就係大中華雅虎總裁謝文，佢上任僅六個星期貨仔就頂唔順說goodbye，可能刷新IT界高層最快離職紀錄，跟住佢會閃入阿里巴巴擔任策略顧問，消息嚇窒一眾IT人，其離職原因更成為業界茶餘飯後吹水良品。
原來揸fit人相繼快閃，主因係班IT龍頭大佬淨係入鄉，又唔肯隨俗。人哋謝文返工第一日就好有heart咁話要花一至兩個月對雅虎業務進行規劃，憑佢打滾沙場多年及獨到嘅前瞻性，全人類對佢嘅大計都引頸以待，點知原來阿「酋長」楊生係嗰隻講又唔聽聽又唔做做又做錯錯又唔改，個性極強嘅型爆人士，搵本地人才只不過係想佢執行美國總部嗰一套，將西方運作模式極權暴力咁全盤放諸大中華照dup！如斯冇癮，謝文當然來一招拍拍屁股，閃！不過大中華IT界從來都係「英雄不長在」，阿楊生可能心諗：大中華大把謝文，使驚搵唔到replacement？