羅馬王子托廸已為人父，但係脾氣依然火爆。前晚羅馬1:1和利禾奴場波，佢再次被紅牌罰離場，成為羅馬球會史上紅牌王。而當托廸離場嗰陣，44歲嘅私人教練史卡拉上前勸佢冷靜，點知畀佢一手推落地。事後，史卡拉仲同托廸講好說話，話係地滑跣親啫！教練史巴利堤都睇唔過眼，話史卡拉對托廸親如父子，托廸咁做實在太過分喇！