近期國壽紅到發紫，A股一上就升到嘭嘭聲，H股都企硬20蚊樓上。不過唔知係咪人紅招人妒，中保監主席吳定富，日前喺內地嘅全國保險工作會議上，就怒氣沖沖咁勁鬧國有保險公司高層人工過高。
華華見到呢番咁「㷫」嘅言論，即刻搵國壽同財險05年年報睇睇，發現國壽董事長楊超年薪都唔夠46萬，雖然嗰時佢只係做咗短短5個月，除番開月薪都有9萬。財險董事長唐運祥年薪173萬左右，即係每個月14萬落袋，同內地官員相比，又好似高咗啲，事關總理溫家寶月薪都係二千多元，唔怪得吳主席講到誓要打擊高薪歪風，隨時展開高薪清查風暴咁話。
如果換轉喺香港，公司高層年薪過百萬都係濕濕碎。華華睇埋中移動05年年報，嘩！不得了！董事長王建宙年薪653萬，月入54萬5，差唔多係保險公司高層嘅6倍。
唔知貴為中國第2大股份、市值1.48萬億嘅中移動高層人工，對吳定富嚟講，算唔算過高呢？