賣磚頭幾時都係最好搵，但搵銀之餘，最好都顧吓道德，事關好多升斗市民，真係掟晒成副身家，希望買到個安樂窩，所以好多大地主都唔係好敢呃啲小業主，免得俾人咒，教徒三兄弟就係一個好例子，啲樓一直都有口碑！不過，亦偏偏有啲人無畏無懼，唔驚民眾力量！華華今日不妨同大家講個起樓界流傳嘅古仔！
話說富豪第二代「無畏無懼」成世人錢從來不缺，但唔知點解份人勁「度縮」，一分一毫計到盡，閒時仲會去買六合彩，同你啲平民爭埋一份，而佢嘅「度」功更加響做生意嗰陣，發揮得淋漓盡致！
故事1：水瓜打狗
「無畏無懼」有時都要同人合作起樓，合作雙方梗係為自己利益諗到盡，而佢就同人哋講，賣樓唔係賺買家，而係賺判頭，當然呢番話亦成為起樓界經典名句，咁點搵判頭笨呢？
舉個例講，一單工程一定有個QS（工料測量師）負責同判頭對數，但佢鑊鑊到最尾嗰陣就換QS，咁判頭之前報嘅價全部變晒，可以由100萬得番40萬，一如水瓜打狗──唔見一大截！
啲判頭可以點？咪要就要，唔要罷就！所以N年前已經有人講，「無畏無懼」如果夠膽單拖，唔帶保鏢出街，而最後又冇事發生，呢單將會係新聞中嘅奇聞！
故事2：錦鯉曲奇
講開「無畏無懼」，八多一單曲奇餅故事畀大家知！錦鯉公同埋錦鯉婆一向響人前都係百分百虔誠教徒，但鏡頭後呢？話說幾年前，董事長腳痛，知道自己極有「餐士」上位嘅錦鯉公，即刻加多兩錢肉緊「做嘢」！
中國人有謂「男主外、女主內」，賢良淑德嘅錦鯉婆，就發揮佢嘅小宇宙，幫夫君一把，點幫？咪係焗餅送畀人囉！有幸收餅嘅都係有頭有面嘅有錢人，「無畏無懼」同埋佢嘅多仔老婆當然有份，唔知早排佢哋粒「慈菇椗」出世，錦鯉婆又有冇煲薑醋，或者煲湯畀多仔婆補身呢？
[email protected]