去買衫買袋可以睇啱價錢先買，去剪頭髮，好多都係就咁寫「$xxx起」，到時洗濕咗個頭佢收幾多錢都得，一時又話幫你整highlight，電髮又分好多唔同收費，好易一頸血。
去開SalonEsprit剪頭髮嘅表姐就成日讚嗰度名碼實價，大人400蚊，細路200蚊，唔會收多。但係早排佢去剪完頭髮，埋單竟然話大人收440，細路加幅仲厲害，要成250。原來靜雞雞加咗價，但客人剪之前又唔講聲，表姐梗係勁嬲。
我多事打畀SalonEsprit向經理投訴，佢話員工次次都會同客人講明價錢先剪，可能嗰次唔記得咗，仲話如果表姐聯絡佢哋，可以退番差價㖭。退錢還退錢，價錢一次過加咁多，唔怕嚇親啲客咩？
逢周一至周四刊出