上禮拜五班好友擺定個陣勢，幾乎講到明昨日要砌上去，試吓月初個歷史高位，昨日真係裂口開出炒上，成交雖然唔係好大，但挾住幾隻大股舞上去，好多人都唔敢跟買，但滙控（005）同中移動（941）個勢咁勁，想造淡都唔會咁有信心。
大市嘅成交雖然只係升咗少少，604億都唔夠，仲有冇得升，圖表派都有排拗，不過，如果空咗期指，要繼續賭真係要好有膽量，個市就算要回，好可能都係試咗高位先，但係期指就嚟結算，好友唔會咁易畀淡友攻番轉頭。
1月份就嚟完結，啲分析員就嚟又會講吓「1月效應」，恒指今個月尾如果高過去年底收市指數19965，咁樣今年底嘅指數就會睇好，雖然𠵱家個世界已經好科學昌明，但靜靜雞話你知，仲有好多基金經理（尤其係歐美嗰邊）好信「1月效應」，跟住嚟嘅指數股買盤會有增無減，所以唔好以為呢兩日啲買盤只係受期指結算影響，受市場睇重嘅「1月效應」都唔可以忽視。
港交所C輪6075：個幾月內介紹咗兩三次港交所（388）嘅C輪，正股轉眼間已經由70元升到92.10元，技術走勢愈嚟愈好，前景都係，呢個禮拜仲會搞系統測試，準備「千億成交」，破100元推向120元唔應該有問題，就算睇短線，，最少都睇105元。港交所C輪6075昨收1.59元，槓桿率5.8倍（有效4.7倍），對沖值0.81，正股上試98元，6075應該喺2.05元樓上，正股上升105元，隻輪應該高過2.70元，呢個價買番啲，正股跌至87元止蝕。港交所最大嘅吸引力係，只要成交旺，個市升同跌佢都得益，期指結算前後，大市成交應該會重上700億元以上水平。
俊 樺