煲呔打晒鼓籌備緊競選連任，班AO（政務官）𠵱家最八卦係邊個做政務司司長（CS）或者財政司司長（FS）。近日有個小型AO聚會，班年輕官員講起肥龍，原來佢喺外面成日笑臉迎人，一切都好似喺掌握之中，好定檔咁款。不過，有AO就話大家唔好俾佢嘅形象呃咗，其實佢喺政府裏面出咗名夠cool，撞口撞面都唔會主動打招呼，畀人高高在上、擺晒款嘅感覺。
唐唐就好唔同，有啲AO覺得佢對同事好親切，唔論大細，碰親面佢都一定打招呼，個笑容唔係唧出嚟嗰種。同唐唐個部門接觸得多嘅AO仲話，佢周不時請同事食飯，仲會帶埋唐太一齊，唔係表演夫唱婦隨，而係好尊重個客人。唔知係咪咁，唐唐喺下屆政府有機會再上層樓？
班AO打死唔信肥龍會再坐一會，有人話佢唔搬入政務司司長官邸，就係費事搬來搬去；班AO話，佢做呢個位，一啲都唔會好似煲呔咁緊張，同時亦唔會睇到佢有乜嘢搏殺。