喫一餐飯$28，好多人覺得只夠去茶記食個燒味雙拼飯！不過去到九龍城京木，竟然可以喫個生劏龍蝦活刺身！另外仲新返咗原隻拮手活海膽，幾十蚊貨仔去邊度搵，點都要試吓！
記者：朱崇德 攝影：陳盛臣
九龍城出名有間老牌「魚排」日本料理──京木，因為老闆馬生喺西貢魚排起家，專攞特別海產而聞名：「西貢經營魚排生意20幾年，同魚類供應商熟絡，所以成日攞到平價新鮮海產！」
今次玩BB龍蝦刺身，竟然取自客人嘅靈感：「某日放假去潛水，俾我摸到幾隻手掌長嘅龍蝦仔，拎落舖啲熟客話要用嚟整龍蝦刺身，一試鮮甜爽滑，味道更勝『大龍』，之後試過多款入口BB龍蝦後，最後鎖定來自澳洲同印度洋兩款龍蝦。」
（1）龍蝦刺身$28
以產自印度洋的龍蝦作刺身，肉身勁爽滑彈牙，蝦頭、蝦肉比例1:1幾好肉，加$10仲整埋蝦頭、豆腐、野菜麵豉湯，勁甜！
（2）龍蝦壽司$32
睇見兩隻箝，有啲似波士頓龍！其實係澳洲藍乳龍，肉地味道偏向較鮮甜，所以用嚟做壽司。
（3）海膽刺身$45
新鮮海膽香港已冇乜人做，因易死難存貨，但馬老闆堅持，海膽取自台灣、大連，入口味重海水味濃，加上夠新鮮，同其他一板板攞貨冇得比。
廚師蝦碌位
呢度嘅BB龍蝦真係超新鮮！話說隻藍乳龍已被薄切起肉，但上枱時對蟹箝仲左郁右郁狂掃場，搞到阿廚要幫佢拮牙籤定位，真係幾生猛喎！
雲丹伊勢海老坑$48
鮮活龍蝦起件香燒！面搽沙律醬入口已勁開胃，再放上鮮活海膽，以其鹹香之氣，引出蝦肉的鮮甜口感。坑者其實是廚師搞鬼之作「……老坑」！
芝心龍蝦卷$45
以皇帝蟹、蘆笋配芝士作飯糰卷物，外包紫菜後再炸成天婦羅！入口是天婦羅及紫菜的脆香，再嚟是芝士溶入蟹肉的惹味，脆脆哋好惹味。
網中鮑$52
驟眼睇以為係春卷，其實是以網狀蛋皮，包裹鮑魚、魷魚、蝦、魚柳、青口、蘆笋等同炸；皮面比春卷更酥脆，海鮮惹味又多汁，口感特別。
海膽焗原隻鮑魚$48
成張八達通咁大嘅原隻海膽，以粗海鹽輕擦後猛火一燒！已逼出鮑魚最原始的鮮味！面放由大海膽打成的「純海膽醬」，略加點清酒吊味，上枱香味四溢。
馬老闆好受食客歡迎，點解？因為次次見到佢都請食客試新菜飲清酒囉！
食神評分（5個★為滿分）
價錢★★★★★
服務★★★★
環境★★★
讚：$28食原隻龍蝦，須知食日本菜係食手工錢，據知係成本價益食客！
彈：裝修設計比較簡單，環境闊落啲會坐得更舒服。
睇路搵食
京木日本料理（23823219）
地址：九龍城福佬村道5-9號地下D舖
座位：35個
營業時間：11:45am-2:45pm、5:45pm-11:30pm
