國民黨榮譽主席連戰娶新抱，噚日喺台北君悅飯店大排筵席60圍，花費大約245萬新台幣（即係港紙55萬左右，計落唔使一萬蚊一圍，抵喎）。全城唔少名人到場，恭賀新婚嘅連勝文同蔡依珊。一對新人心情靚絕，又攬又錫，溫馨非常，睇到新老爺連戰同新奶奶連方瑀笑到見牙唔見眼。不過，如果連戰恨抱孫，睇嚟就要等一等，因為婚宴之前連勝文已經同八方嘅台灣同事講到明，目前重心放喺事業，生小孩「沒這麼快啦！」
連戰嘅國民黨多位友好都嚟恭喜新老爺，又一人一句勉勵一對新人。立法院長王金平叫連勝文要做一個「沾鍋」男，多幫蔡依珊洗碗；港人熟識嘅小馬哥就以「愛妻五原則」祝新人「百年好合」。