以前好興用買菜比喻買樓，尤其係樓市旺嗰陣，篤吓手指就買一層，幾乎連價都唔使問。但自從樓價大跌後，用嚟比喻買樓嘅形容詞，反而變得更加多元化，喺《數碼講──地產論壇》入面，網友wyli出題問：「睇樓同睇男朋友，有甚麼共通點？」
睇啱就買 唔啱就換
最快回應嘅眼啤啤話：「內涵同設施，地點同質『數』。」可能實在太過言簡意賅，惹來共清團質問：「乜嘢係男朋友『設施』？男朋友加工過係咪等於多咗『設施』？乜嘢係男朋友質『數』？『質』係咪等於質感？『數』係咪等於數量？」問得好玄，可惜眼啤啤冇再回應。
跟住幾個網友都講出自己嘅感想，好似一個仙話：「睇樓，睇啱咪買囉……唔啱咪睇過第二層囉！睇男朋友，睇啱咪結婚囉……唔啱咪同過第二個一齊囉！」如果可以咁簡單就梗係好啦，最弊係畀人𠱁咗入局，到買樓（結婚）之後先後悔，賣樓（離婚）傷身又傷心。
可租可買 可圈可點
至於更加貼題嘅比喻，好似小睡魔話：「睇樓同睇男朋友一樣，可租可買，租可簽一年生約一年死約，或兩年死約，約滿（甩拖）可租另一件；如果買，就要去註冊處簽賣身契。」比較正路嘅答案就有益力多，「睇樓同睇男朋友一樣，可先租後買，買咗都可以樓換樓。」
仲未夠喉？屁屁吉拉話：「最緊要講口碑！」好好味強調要「合眼緣。」米飯蟲搭嘴：「要真才實料。」一眾姊妹都幾多要求，各位未有女友嘅男讀者，應該好好反省。不過，話時話，點解淨係講睇男朋友呢？如果比喻女朋友又點？答案可能係──最緊要冇僭建、唔係化妝樓、唔係A貨豪宅……