唔知係咪卡通王子嘅功勞，為敏妮blog換咗個周日特別版，令當日clickrate突破1100次大關，敏妮嘅興奮程度同噚日恒指創新高一樣。孫柏文恨得牙癢癢之餘，仲不斷呻：「好激氣呀，敏妮點解你之前啲廣告可以咁賺錢，但我個blog嘅廣告只係賺到一毫幾仙！」
「廣告商要睇你個blog寫乜內容，先至落相關嘅廣告。我寫嘅嘢同理財有關，自然吸引相關嘅金融機構落廣告。你打開報紙睇吓，前幾年版版廣告都係減肥纖體，但近年已經畀銀行理財產品取代晒。其實理財係大趨勢，係人都想賺錢，為自己嘅財富增值。」
「我都有寫呢方面嘅嘢吖，我有叫人買白銀，又有叫人炒和黃（013），基金我都有講過，但都只係偶然有呢啲廣告落喺我個blog度。」
「只係怪你唔專注，有冇諗個你個blog嘅定位？你個專欄乜都講吓，上至天文、下至地理，連撞車意外、唔見手提電話都寫，好聽啲講係包羅萬有、目不暇給，以寫blog搵錢角度睇，就係天花亂墜，毫無定位。」
「我已經開始緊系列式咁寫投資嘅內容，希望吸引啲高質素廣告。」
切忌本末倒置
「有冇諗過你寫blog係為咗乜？抒發己見？同讀者溝通？抑或只係為咗廣告？如果寫blog只係為廣告，你會愈嚟愈冇廣告！」
「各方面都會顧及。」
「專注！做乜嘢都要專注。當然，我唔贊成你專注為廣告。我寫blog係為咗將我聽到、遇到嘅理財貼士同人分享；亦希望拋磚引玉，等其他網友同我分享佢哋嘅經驗，希望有一日我個blog或者專欄，可以做到一個理財平台，大家喺呢度交換理財情報，係人諗到理財就諗起敏妮Talk。廣告係次要，因為只要建立咗江湖地位，根本唔憂冇廣告！」