謝安琪同張繼聰前日喺赤鱲角機場富豪酒店註冊兼擺喜酒，夜晚七點左右，王菀之上台彈琴唱歌，然後一對新人註冊，雖然新郎新娘好緊張，但講誓詞時完全冇口窒窒，之後切完蛋糕之後，張繼聰仲好sweet咁餵懷孕五個月嘅老婆食一啖，寓意分甘同味。
千嬅中基冇影
不過最精采場面當然係搶花球啦！話說小儀、薛凱琪（Fiona）同王菀之成班女仔走去搶花球，Fiona同小儀你推我讓之下，個花球已經向住王菀之方向拋出，由於成班人避開，搞到個花球跌咗喺地，王菀之即刻上前執起，恨嫁恨到出晒面！
到咗夜晚11點幾，謝安琪換上晚裝送客，一對新人成晚笑到四萬咁口。至於新人預留咗位嘅前緋聞情侶鄭中基同楊千嬅等等，全部唔見影，淨係見蔡卓妍（阿Sa）同周麗淇到場。另外，森美食完半隻龍蝦就趕返商台主持《森美移動》，前晚喺節目中暢談婚禮實況之餘，仲叫小儀現場直擊，搞到好似做騷咁熱鬧。
