是日金句：
”Maybepartyisover,butpeoplearestilldancing.”
──GeorgeSoros
時間：2007年某日中午
地點：公司Pantry內
背景：尹思哲沖咖啡期間，碰見人事部主管Jeff
尹：喂，最近見你面色不大好，身體無大礙吧？
Jeff：身體就無大礙，但心情就有好大礙，都怪我當初睇錯市。
尹：你出名無寶不落，今次老貓燒鬚，衰乜？
Jeff：我年初在國壽25元水平落call，今朝跌穿20元，你話傷唔傷？
尹：不至於撇賬吧？
Jeff：都可以咁講。
Jeff：記得今年國壽A股新上市時，一直有升無跌，當時不少專家同投資大行話過，1年35元，3年90元，諗住H股同樣受惠，點知搞成咁？
尹：咁大個騙局你都上當，唔似你喎。
Jeff：我最初都唔信，但係睇住隻A股掛牌首日就見40元，之後一口氣衝破50元，班專家嘅預言頓時應驗，個心想唔郁都難。
尹：雖然話國壽上年全年累計保費收入有1838億人民幣，較前年有可觀增幅，但記憶中，國壽當時PE已經高得出奇，H股差不多80，A股就成百幾，咁你都落叠？
癡人說夢也令人信
Jeff：我都做過吓功課，知道保險公司的主要盈利來源根本不是承保利潤，而是保費投資收入。當時就有報告分析過，假設國壽投資回報率在2013年提高到8%，每股精算價值有34.07元。如投資回報率在2013年提高到10%，每股精算價值就90元。睇落又好似幾合情理，加上當時個勢一路起緊，手腳慢點，A股一個唔覺意直撲90元，到時想趕尾班車食大茶飯都難，所以終於忍唔住。
尹：你認為國壽投資回報達雙位數增幅話咁易？
Jeff：我都知保險公司唔同高風險基金，十分重視風險控制，投資先天原則係唔可以太進取，就以一些較具規模的保險股，好似宏利金融（945）咁，公司嘅債券同定期存款都佔成66%，股票比例只可以佔好小，穩穩陣陣，過去5年平均投資回報率也不過6.1%。以國壽呢間剛起步嘅公司嚟講，投資限制較多，要做到10%增長，根本就是癡人說夢，可惜當時就係瘋狂過龍。
尹：就當A股急升，H股同A股都係兩個不同市場，內地有外滙管制，兩者根本不能套戥，所以你過份着眼A股升幅，其實都有盲點。
Jeff：𠵱家當然知道，不過，雖則話呢隻係國寶級龍頭保險股，增長潛力驚人，不過任何靚股都唔應該偏離合理價，都怪當初好勝心切。
尹：我忽然間想起大鱷索羅斯一句名言："Maybepartyisover,butpeoplearestilldancing."andyouwereoneofthem.
Jeff：如果你呢句說話喺年初同我講，我諗我今日就唔會搞成咁。
案內人隨筆網誌：
http://wanszezit.wordpress.com/
電郵：[email protected]