最近有個蚊型盤發展商，揚言高價開賣，仲話佢哋啲高層單位值過萬蚊一呎，市場都唔多睇好銷情，但咁啱附近一個幾十年樓嘅龍頭屋苑，當中一個複式戶突然有客用9000幾蚊一呎高價買入，令到呢個蚊型新盤嘅價錢，即刻變得唔算揦脷。
好多人會將呢樣嘢同新股上市前，啲影子股俾人炒到飛起嚟比較；但原來住宅樓出現影子樓嘅情況，十幾年前已經存在，只不過後嚟個樓市謝咗，發展商要減少賣樓，至漸漸俾人淡忘，勢估唔到喺樓市唔係咁好世界嘅今日，都有影子樓出現。
前輩講嘅江湖傳聞
究竟乜人肯用9000幾蚊一呎，高價買入一個舊樓單位？認真耐人尋味。
華華聽前輩講，市場上多年嚟都有一個江湖傳聞，某啲大型發展商為咗谷高新盤定價，會喺同區高價掃入優質二手單位，製造樓價高處未算高嘅假象。
尤其係90年代樓市長升長有嘅繁華盛世時期，唔少大型新盤正式發售之前，同區焦點屋苑嘅二手呎價例必炒得火熱，咁新盤定價再高，都唔會令人覺得唔合理，自然可以吸引大批買家同投資者入市。
專人小組掃貨托市
更有傳聞話，某大發展商設有專人小組，專門從事掃貨托價工作，後嚟更因個市愈炒愈熱，呢個小組淨係一買一賣賺差價，都已經有可觀業績。當然，呢類傳聞多數都係一啲老行家之間嘅茶餘飯後話題，根本無法引證。
回歸以後，樓市俾老董震散晒，好多發展商要蝕住咁賣樓，仲邊有咁好心機玩手段谷樓價吖，有關傳聞已經成為純粹嘅趣聞逸事。不過，近排二手樓市突然間反彈，大型屋苑交投比上個月閒閒哋多一兩倍，好似某個龍頭屋苑一個複式單位，竟然賣9000幾蚊呎，咁啱同區就有個賣價高到唔合理嘅馬路邊新盤賣緊，咪即時令部份行家聯想起以上嘅傳聞囉。