港股喺2006年好威，踏入新1年嘅第1個交易日仍然好有勁，跟住就出現調整，仲好快跌穿20日線，搞到人心惶惶，不過，喺一眾睇淡嘅聲音之中，恒指即刻拗腰反彈，升番上20日線上面，「十字星」收市，上禮拜就食住呢個氣勢，升上20327收市。
的確，個市嘅技術走勢好靚，不過，成交就唔係好大，投資者對個市可唔可以繼續上升有啲保留，但係以圖論勢，港股今日仲可以睇好啲。
大市上升冇大成交配合，只係一種表面嘅感覺，雖然上禮拜未見到700億元以上嘅單日成交，但最後3個交易日整體成交已經多番，其實唔算曳，只要恒指上破20550嘅時候有大成交配合，咁就掂晒，當然啦，如果指數升唔破呢個位跌番落嚟低收，就有可能係營造「雙頂」，大家就要小心。如果出現「雙頂」，係咪要散水清貨走人？又唔使咁驚，10日線同20日線升緊上嚟，19800又好有支持力，個市就算調整，都唔會跌得好急，起碼喺19800嘅水平有機會畀大家部署。記住，恒指若果以大成交衝破20550高收，喺期指結算臨近呢刻，好友絕對唔會手軟，炒C輪嘅時候可以進取啲，直到逼近21000關先再部署。
中煤C輪9090：煤股受好消息刺激，升得幾全面，半新股中煤能源（1898）上禮拜五報收6.66元，個圖好靚，買賣亦好熱鬧，睇個勢好快可以試7元，破位睇7.50元。中煤C輪9090現價1.59元，槓桿率4.2倍（有效3.3倍），對沖值0.78，正股升上7元，9090會升到1.85元樓上，正股升上7.50元，隻輪應該唔會平過2.25元，現價買，正股跌穿6.30元止蝕。
俊樺