07年股市變化莫測，日日都炒唔同種類嘅股，好似上個禮拜又到番藍籌股當炒。但好多網友仍然關心中國交通建設（1800）同中煤能源（1898）兩隻中資股，粗略統計，單喺《香港討論區》就至少有近30個關於中交同中煤嘅post，絕大部份仲係過去一個禮拜post上去嘅。
7.5萬次點擊認真誇
睇番查看嘅次數，都幾誇張㗎，好似中交就有超過5萬次，仲有近1600個回應𠻹；中煤嘅查看次數亦有近2.5萬次，回應就差唔多有1000個。
以中交為例，hkboyhk2喺18號鋪咗個「1800果然再創高峰！有貨請嚟揮下手，打打氣，渣渣油價!!!」即刻引嚟6770個clickrate。而喺今個月2號由採購部小白鋪嘅「1800走唔走好？」短短十幾日已經有13621個clickrate，反應認真熱烈。
至於中煤嘅擁躉亦踴躍發言，窮金蛋喺19號鋪上網嘅「1898中煤fans……」竟然喺幾日間有超過8000人睇，可見關心呢隻股嘅股民認真唔少。
呢兩隻股咁火熱，自然好多人想知股價點睇，trans問：「1898可唔可以升到$7？」aprse問：「1898星期一22號，入唔入得過？」而stella_food同gonofai就齊齊想知──出貨好唔好？reddogdog就話：「1898呢鑊打死都唔會咁快放！」不過，100millionhkd就唔睇好，「中煤能源下星期一要全數沽出清貨」，仲吸引到627人查看。
買定沽股民十五十六
既然咁多人想知呢兩隻股嘅走勢，topwai威威就索性喺18號搞個調查，問吓「中交及中煤聽日（22號）點呢？升定跌？」總共有74人投票，23人覺得1800會升，22個估1898會升（見圖）。
兩隻股份走勢係點，答案今日就揭盅嘞。上個禮拜五中交收報8.66元，跌0.8%；中煤就收6.66元，升6.39%，大家可以做吓參考。
