吳文忻削骨去脂及隆鼻瘦面，自被冠上整容女星稱號後，有人讚她勇，有人踩她笨，但她依然你有你講，我有我態度。
手術刀可以為吳文忻改頭換面，但改不了她一顆堅強的心。在娛樂圈浮沉9年，被人問價賣肉。不過她誓神劈願，說從來沒有接受過不道德交易。
「性感女星唔代表做過不道德交易，但純情女星亦唔代表佢冇做過。」吳文忻血淋淋地揭開娛樂圈的黑暗面，比起整容，會不會來得更可怕？
吳文忻是98年港姐季軍，她是美國大學畢業生，美貌智慧俱備，卻選擇跑進娛樂圈當小明星，不過星運平平。一個多月前，吳文忻接受美容院老闆蕭定一邀請，以100萬酬勞擔任全港首位整容及整形代言人，到韓國接受合共6項的整容及整形手術，名副其實改頭換面，博到見報成焦點。
自認懶散怕蝕底
吳文忻的星途也有點坎坷，至02年簽約M8，卻被投閒置散，早前才跟蕭定一簽賣身契，變臉後她會繼續勇戰娛樂圈，但回顧過去不無感慨，吳文忻說：「我喺娛樂圈嘅發展比上不足、比下有餘，有啲人出嚟幾年唔見咗，有啲港姐就做咗花旦。」
「我覺得以前做嘢係懶，如果有機會好似阿佘（佘詩曼）咁拍劇，日拍夜拍，我有咁嘅機會都未必頂得住，我試過喺TVB拍一套劇，3個幾月冇見過嫲嫲，有日我攞住個飯盒坐喺化妝間喊，如果一直都係呢啲生活，會好頂唔順。以前我好鑽牛角尖、怕蝕底、太直、唔識修飾，𠵱家待人處事至冇咁起角，反省番都覺得自己有問題。」
坦認收Call拒飯局
由於吳文忻行性感，故不少人都會有「性感女星露肉大抵拋個身出來做」的感覺。
吳文忻知道背後有人說三道四，但就坦然的說：「呢樣嘢喺個圈一定有存在，有冇人call過我呢？一定有，但我可以理直氣壯講，從來冇接受過任何不道德交易！呢行女星離不開少少性感，性感唔覺負面，唔通包到實至想睇咩？有人覺得性感代表出嚟撈，但其實係代表你眼光愚昧。性感同見報率有相連關係，着樽領衫出嚟可以上報，我都想。但我係從來冇出賣過自己，我係潮州人，不嬲都好有骨氣，唔需要理會人哋眼光。」
她續說：「你哋喺報紙上，見到有少少性感嘅女星，唔代表佢做過不道德交易，但一個好純情女星亦唔代表佢冇做過，呢樣嘢唔會有代言人。我可以誓神劈願，我冇。我咁堅持，好thanksgod，係冇家庭負擔。」
勢好失Job俾人跣
娛樂圈從來都是現實的，至於圈中是否隱藏黑暗面，吳文忻更是一語道破：「呢行現實一定有，一定有人為咗機會接受不道德交易。圈裏面有人同我講過，話你接受一啲嘢就有機會做一線女主角，我冇選擇到，其他人我唔知啦。有一段時間，我都好灰，但我相信都有女星潔身自愛。我呢幾年一路做好多踩界嘢，性感、整容都係踩界，但我對得住自己、對得住屋企人，賺嘅每分錢都係馨香嘅。」
作為一個沒靠山的小明星，她在圈中仿似無根人，被玩是指定動作，她說：「你個勢好啲嘅時候，被人用平價搶job，又試過有演員夾埋記者造我，我哋一齊做嘢，冇害過佢，但佢用身邊人賣料畀記者，我真係被人跣得多，所以對圈中人會有少少距離。」
