聽馬圈老校長講，四十幾年前佢開辦私立中學，學校未裝修好，課室座椅未到齊，喺咁意喺《華僑日報》賣四分一版招生廣告，已經收滿學生，重有幾百人向隅。嗰陣時收學生，多多益善，教育署只求學生有學校收，對學校超收學生視而不見。
時移世易，四十幾年後，情況唔同晒。當年一位年青小學教師，精力充沛，覺得前途美好。佢間小學曾經出產名人湯家驊、馮紹波、彭玉榮及前李八方，幾有名氣㗎！步入二十一世紀，年青小學老師已經希望抱孫，呢日來電，向左丁山訴苦，佢話：「𠵱家小學收生，一個也不能少，否則便會殺校關門，校長教師要轉學校或失業。」左丁山笑佢，「Ｈ兄，你兩位公子已在華爾街揚名立萬，你已退休好耐，重為小學收生而奔走，因乜事呀？」Ｈ兄話：「顯徑邨呢間小學我有份參與創辦嘅，我對學校好有感情，十八年來校譽一向唔錯，只因為沙田大圍嘅適齡學童逐漸減少，冇法子唔為招收小一學生拼老命。」
其實有時搏命都冇用，小一收生要食腦，唔係食力。Ｈ老兄話：「這個當然，我哋一班大學校友出謀獻策，早與馬鞍山一間中學結龍，小六生可直升中學中一，跟住興建校舍新翼，圖書館人見人讚，小學少見，故此呢兩三年都可以收到足夠小一新生，但不可以鬆懈下來。」唔淨止大學要辦開放日引誘中學尖子，小學都辦開放日招待家長及幼稚園生，遲早恐怕要招待幼稚園校長做roadshow。
Ｈ老兄話：「我哋樣樣做齊。開放日之後，兩位家長來信，一中一英，稱讚我哋啲學生友善，談吐溫文，而老師則表現十分熱心咁話，反應相當唔錯。」不過講到底，小學中學結龍要睇成績，小學唔希望中學嘅會考成績差，中學唔希望小學嘅學生水準低，一啲著名學校話要「脫龍」，就係呢個原因。Ｈ老兄話佢哋好了解呢個情況，除咗自己努力教好小學生之外，亦密切注意結龍中學嘅會考成績，總之互相監督，等條龍唔好脫鈎。Ｈ兄話：「呢間位於馬鞍山嘅中學考會考只有兩年歷史，第一年及格率63%，去年第二屆急升至82%，增長勢頭好勁，會係明天嘅名校。」