呢幾年日本動漫熱潮席捲歐美，唔少名作如《龍珠》同《星矢》都不斷出Game，服務顧客嘅同時亦可賺吓美金、歐羅。今次輪到都算幾Hit嘅《幽遊白書》，由於係街機移植強化版所以先喺日本推出，佢同過往亂打一通有啲唔同，唔單只係講求戰術嘅3D格鬥，仲加入咗爆氣系統，搞到死飛仔幽助都要學悟空咁變身做超西！
文：陳福榮
加新人新模式
部份格鬥狂熱者曾經批評過，呢款由Dimps開發嘅《幽遊白書死鬥！暗黑武術會》雖然係朝向正統3D格鬥道路嚟做，但佢唔少地方做得略見不足，甩漏百出平衡性唔好，所以喺香港機舖好快就沉咗。老實講，年中推出唔少嘅動漫改編遊戲，不嬲都以家庭用家為主，你估隻隻都係《高達VS》系列咁正咩！為咗令PS2版更有賣點，製作人員勁加新模式和新人以求延長耐玩性，如果鍾意呢套動漫就應該會玩得好開心，始終佢唔似出咗N集嘅《龍珠Z》咁，亂打一通都過到版。
正過睇電視
今集《幽白》喺動畫部份更有新玩法，不過前提係要玩家先爆一次機，咁之後睇過嘅影片可以再揀嚟睇，亦即係話只要爆機儲晒所有嘅片，就可以一氣呵成睇晒佢，買隻遊戲碟就好似買咗隻動畫DVD一樣喇，呢樣嘢就連《龍珠》都做唔到，認真抵讚！仲有佢搵番原裝聲優幫角色配音，打緊嗰陣係唔係都叫到坼天，極有睇卡通片嘅感覺。
45分鐘數碼修復片段
港產片興過一排大搞數碼修復，今次《幽遊白書》都有類似嘅嘢做畀大家睇，佢將成套動畫嘅精華片段重新剪輯成45分鐘，以21世紀技術重新執過，再配上旁白與字幕幫各位極速重溫，話時話真係同睇精華版冇咩分別。至於質素更係同當年睇電視版差唔多，而音質似乎更有過之，點計都係07年出品，而且係開發成熟嘅PS2上推出，動畫部份無論聲畫都有一定水準。
爆氣超必反敗為勝
《拳皇》或《街霸》通常都要靠超必嚟食糊，一般3D格鬥就冇呢支歌仔唱，不過《幽白》就糅合咗兩者特色於一身。平時佢啲拳腳追打威力已經唔細，四五下就可以收工，不過出波放Laser嘅大招就扣得仲勁，必須經常出招以保持住靈妖力，先可以使用幽助嘅靈丸或桑原嘅靈氣劍呢啲必殺技，而超必更會扣晒全條靈妖力，唔到九死一生都唔好亂用。至於同時按PKG掣進入嘅本氣Mode，角色唔單只會爆晒白光變埋造型，仲有能力特性會有所分別，攻擊力增強招式亦稍作變化，熟習後就可以靠佢嚟戰勝對手。
家用版新玩法
家用版同街機嘅最明顯分別，除咗播片就係新增嘅大量全新玩法。先講120%模式基本上係街機嘅加強版，不但可選擇既有嗰16位固有角色，只要喺故事模式Unlock晒班隱藏人物出嚟，就可以任揀PS2限定嘅仙水、阿樹、剛鬼、亂童和朱雀嚟玩，當然大多數玩家都只係想用仙水啫；只可惜街機獨有嘅評述員小兔就冇得用咯。至於故事模式亦係跟足原著，由最初大戰剛鬼、幽助同亂童爭拜師席位以至幻海船上狂抽雜卒等都一應俱全，再者仲有超搞鬼嘅「自製讀碟等待畫面」，雖然勁無聊但真係佩服開發人員嘅心思。
機種：PS2
廠商：Banpresto
類型：格鬥動作
人數：1-2人
