中國大力扶助農業發展，中化化肥（297）係中國最大的化肥產品分銷商，當然最着數。1年前，中化由1.40元起步，短短3個多月，升上3.35元，升幅140%，之後就在3元水平足足唞咗8個月，在眾多利好因素推動下，07年又係中化天下，今次再發力，有機會坐四望五。
ヾ國策扶助。發展農業係中國「十一．五」規劃的重點項目，現正係起步，中央用於農村基礎設施建設將投入不少於3萬億元人民幣，可為相關企業帶來5至6萬億元商機。中化具行業龍頭地位，必然最受惠，現時1年營業額逾200億元，保守年增長30%至40%，已經不得了。
ゝ注資成熟。公司去年初話到明，1年之內會進行大型注資，家吓時機成熟，大股東中國化肥集團持有的3項化肥業務，包括清海鹽湖鉀肥18.5%、山西天脊40%同山東肥業60%權益，將會在今年內陸續注入，全部收購完成後，中化的產能可由現時的300萬噸增至800萬噸，盈利又可翻一番。
ゞ關稅下調、人幣升值。中化佔全國入口化肥市場45%，隨着各類化肥產品入口關稅由4%下調到1%，以及人民幣持續升值（估計今年再升5%至7%），中化又賺多好多。
々再擴市場。中化現時銷售網已好龐大，門市有1150個，覆蓋20個省分，並計劃在08年底將門市增到2000個，市場佔有率由現時的12%增到24%，經營效益大大提高。
多家大行看好
利好因素多籮籮，前景樂觀，大行亦紛紛睇好，花旗指中化未來3年複合年增長可達20%，評級「買入」，目標價3.70元。高盛報告指中化長線投資價值並未反映，維持「跑贏大市」評級，目標價3.80元。中銀國際指中化注資可令未來兩年每股盈利分別增加10%，評級「優於大市」，目標價由3.10元大幅提升至4.37元。
創富科技（340）上周五消息好勁，兩手大成交合共1億股，俾兩個大芬接去，聽聞仲有幾個大芬傾緊，要貨量亦係1億至2億股。聽芬佬講，創富有大動作搞緊，佢哋𠵱家上車，揸長線，心目中嘅股價係3至4元。
郭兆誠