一年伊始，歐盟駐港澳辦事處主任魯堂安（ThomasRoe）上星期宴請傳媒。話題講到最近中國同東盟簽訂區域貿易服務協議，佢話，呢個協定少有地包括服務貿易，同以前大多數區域協議主要只涉及貨物好唔同，無疑畀停滯不前嘅世貿多哈回合談判加咗唔少壓力。
各有山頭 出入口煩死
不過，呢類區域協議始終唔及代表全球嘅世貿多哈談判，因為如果全球出現成千個呢類區域協議，作為商家都唔知點算，將貨物出口去唔同嘅自由貿易區，面對唔同嘅關稅及入口要求，行政管理都煩死。
至於一拖再拖嘅多哈回合談判，歐盟主責貿易及經濟事務部主管柏禮碩（FelipePalaciosSureda）話，𠵱家歐美等國家都好想重開談判，積極喺美國貿易談判代表今年中嘅任期期限前完成，因為若多哈談判有協議，對大家都係好事。