沙田乙明嘅「金沙角」，有間出名$40任打老邊舖，有瀨尿蝦、肥牛、豬粉腸等50種食材，連罐裝可樂汽水任飲及湯底，1個人約$70蚊落樓，都幾抵玩！話說某日同老死約誓一戰，大佬龍抵步即話：「正呀！全露天、食得煙！」點知把烏鴉口一講馬上落雨；說時遲那時快，只見幾個赤膊、短褲、人字拖壯漢圍定四角，其他枱食客猛話要膠枱布，個個搭帳幕咁遮住爐枱食具；閃電間壯士們已如蜘蛛俠般爬上樓頂鐵絲網架拉起帆布，回頭發覺食枱同頭頂已一面灰，掃興！嗰班蜘蛛俠冒住雨、全無安全設施爬上架頂真係幾危險，生命冇Take2呀！