中原地產01年收購利嘉閣，用兩個品牌經營代理業務，經過幾年證明成功，中原（中國）睇見咁樣，都有意效法，但唔係收購同行，而係成立多一個品牌；深圳中原已經積極籌備緊，仲喺集團網頁內公開招聘人手，職位係副總經理，應該係集團公開招聘嘅最高級員工。
咁會做乜呢？就係協助總經理李耀智管理經營新公司，開拓深圳三級市場（即係香港嘅二手市場）代理業務，處理管理營運嘅相關事務。不過，李耀智話𠵱家仲係「乜都未有階段」，冇人手同冇公司名。
聽李耀智講，新公司會走專業化路線，希望擴大深圳市場佔有率；𠵱家佔有率不足兩成。佢補充，深圳有幾個同行走緊呢個方向，都做得唔錯，證明有得諗。
深圳中原開多個品牌，點處理「自己打自己」嘅問題，李耀智承認無可避免，但相信係良性競爭居多。
等人挖角 不如自己闖
聽講中原（中國）最初係上海同事提出呢個構思，但咁唔好彩當地市道唔就，結果俾深圳飲咗頭啖湯。
中原（中國）董事總經理黎明楷話，中原開舖速度唔算快，同事發展空間受限制，與其俾人挖角，不如嚟一招「做生不如做熟」，開個新品牌畀佢哋「闖一闖」。
𠵱家深圳中原有130幾間分行，前線連後勤共3138人，預期今個月營業額有4000萬。