97年樓市㷫烚烚，炒家唔使睇樓即掃，小市民求其望吓就極速入市。不過買樓唔同買棵菜，入市還是小心為上。
網友馬高李打算今年成家立室，𠵱家為層樓煩緊，咁啱荃灣有個平價新盤HCube，單位細細啱上車，可惜佢對呢個樓盤所知有限，只知低層望樓同工廠，有個24小時會所，及發展商係南豐，於是喺《Uwants討論區》度求救。
可能個盤唔係大家杯茶，意見唔多好，有人叫馬高李買居屋好過；有人話又貴又細又唔實際，仲係工業區，咁嘅價錢大把選擇啦。
其實上車客買樓，思前想後皆因經濟問題，網友AA117就提醒話：「你有幾多預算，供樓大約預入息三成好嘞！同埋睇你做幾多成按揭啦！」至於對個盤嘅意見，只有輕輕一句：「南豐一般啦，唔算太差，比起長實、華懋就一定好啲。」
kai721同馬高李一樣，都想買樓，佢話同女友月入加埋二萬七，諗住買兩房單位，唔知可否負擔？billyskf教路，「高層兩房要200萬，如果有35%首期，即70萬，借130萬，分20年，月供八千六，咁會輕鬆啲。」
搵得少制唔過
停一停，計一計，200萬錢唔少，kai721都覺得「咁快買200萬樓，唔係啩？」zzmikemike都提佢，「搵兩萬七，買200萬嘅樓，好重皮……130萬左右好嘞！搬出嚟住，仲有好多開支……」
雖然網友意見唔多正面，但HCube樓價低，去貨快，開放式單位仲一早賣光。諗得嚟都未必買到，建議佢有心買樓，一早做定功課，了解心水樓盤資料，同自己供樓能力。