離開正常狀態，又係另一個世界。Lomo相機風行全球，就係因為用數碼相機，好難先做到這種色彩唔正常地強烈、鮮明但又好Warm嘅效果，就係因為佢唔正常唔完美，先會令咁多人着迷。WolfgangStranzinger，Lomo嘅主席話︰「數碼不朽，亦不代表菲林將亡」。啱！所以Lomo嘅始祖相機LC-A死過翻生，改良版LC-A+還魂返陽，翻生之餘，新舖更在上環插旗！
記者︰劉昱蘭
攝影︰林栢鈞
Lomo=溝通嘅語言
喺條街舉起部數碼單反機，途人反應通常先係畀個「嘩！乜咁大陣仗！」嘅迴避眼光，然後彈開，而拎起的骰嘅LOMO機仔，即時殺傷力大減，甚至讓人更親近。Wolfgang講番起一對情侶的故事︰「幾日前喺上海，有個男仔話我知，佢靠部Lomo識到𠵱家嘅女友喎。有次佢去聽Concert，見到個女仔帶住部魚眼Lomo相機，就同佢講話自己都有部一模一樣，就係咁展開咗一段情緣，我諗呢啲Lomo故事每一日、每個角落都會發生。」影相想色彩同氣氛Warm啲，人與人之間又Close啲。
俄國相機大陸重生
LC-A都死過一次，唔係因為俾菲林唾棄，其實部經典機LC-A極渴市，但因為手做相機舊技術無人想學，加埋生產成本高漲，幾有市場都迫住俄羅斯廠停產。但因為世界各地都不斷有叫佢翻生的呼聲，Lomo要解決人手問題，最後決定返大陸呢個巨大人力市場，Keep番全人手生產，Wolfgang話𠵱家可以月製1,500部LC-A+，供應無問題，加埋佢影出嚟黑角影像效果TunnelEffect咁獨特，相信呢部傳奇相機可以Everlasting咁話！
LC-A改咗啲乜？
LC-A喺90年代初高科技踢走舊技術的時候，由幾個維也納學生喺布拉格無意間發現，佢哋覺得本來係蘇聯間諜相機嘅LC-A幾得意，買咗就喺旅途上Don'tThinkJustShoot喪拍。返到維也納見識其奇特效果，令LomoLC-A大熱成為經典機款。Reborn的LC-A+作了不少新改進，例如多重曝光。而菲林感光範圍亦擴大咗，取消ISO25和ISO50，換上ISO800及ISO1600度菲林，最啱唔鍾意用閃光燈的玩家，夜晚、室內都影到靚相。
新舖Sell啲乜？
新舖當然係Lomo相機、配件、書等產品的專門店，但其實更緊要嘅係一個Lomo友交流嘅地方，舖仔細細，15米長的LomoWall固然搶眼，舖中空間就淨係放咗一張梳化，就係想Lomo友舒舒服服咁Sharing。喺門口抬眼望，會見到兩塊可以拉下的展板，第日你想將有主題的Lomo相放喺舖度參展，絕對有得傾。
店內有個Corner，可以見識吓中國海鷗牌、烏克蘭Fed的絕版相機。最上面嗰部係Lomo舊廠出產的SMENA相機，鏡頭外圈上面印上陰、雨、晴等天氣符號，睇天氣就可以揀啱光圈。
Lomo魚眼鏡相機，與法國Colette交叉的特別版連雙CD。$500
LomographyShopHongKong
地址︰上環普仁街2號地下
電話︰25255417
營業時間︰星期一至五11:00-19:00
