約靚女康華掃街試菜：「北帝街？邊度？點去㗎？」殺落去先知，原來竟是土瓜灣新食街！5步之內必有1間食店，但間間照排隊！中國地方菜至強，罕見新疆菜、正宗雲南氣鍋雞、$10碟潮州打冷……開得密集、間間有特色！真係好有九龍城食街風範！
記者：朱崇德
攝影：陳陶鈞
約康華食飯真係有啲難！連趕《舞動全城》、《古靈精探》兩組戲，隔場時間飛車落嚟試食：「我記得北帝街以前係車房同五金舖，真係唔知忽然開咗咁多食肆！」土瓜灣龍頭樓盤──傲雲峰、海悅豪庭、帝庭豪園、欣榮花園，圍繞北帝街，街坊消費力強，食肆走中高檔，加埋通街泊車位，真係好有九龍城初冒起時風範！全條街只有4個街口，食店就足40間！記者更愛係呢度菜式質量高，價錢平呢！
食軒打冷小菜好抵食
食軒嘅潮州菜，係北帝街內出名排隊舖！每晚6點晚市開鑼，就排到11、12點，老闆曹生話：「平均每晚賣過2,000至3,000個小菜！好多客要等成個鐘先有位坐。」呢度最出名係$10小菜連招牌滷水鴨都有得食，「後生嗰陣試過4個人打冷食成$900，所以我開舖志願係要令打冷平價平民化！」
蠔仔肉碎粥$10
5毫子咁大嘅蠔，點都叫唔上蠔仔粥啩？「我哋特別選用福建蠔，有時仲會成個1蚊銀咁大！」配方魚、肉碎、冬菜、炸蒜、唐芹；諗起茶記都要$5一碗靚仔，你就知幾抵！
鮮口大眼雞$30
每日最快斷貨！冇計，$30一條，一般打冷舖開邊半條都食唔到，老闆話：「雖然平！不過我哋仍堅持日日用新鮮貨，冇得剩自然新鮮。」
醉酒鮮雞鍋$48
將鮮雞浸熟，再以雞水加紹酒、當歸、北芪、杞子做成鍋，酒味藥味勁香，但雞則剛熟嫩滑，食時連湯都飲埋。
招牌滷水鴨$10
上6、7斤的大鴨做滷水：「滷水料我哋會做泰式滷水，香味重啲，滷水味冇咁鹹，食得健康啲！」老闆仲話每枱客食滿$100就送1碟，真係幾豪氣。
大漠 新疆羊架連骨夠入味
微黃昏暗燈光，古舊木枱椅及粗陋的食具，配襯香港罕有的新疆菜，康華一入去已大讚格調氣氛十足，媲美高級餐廳！食品都好強，有30多年西廚經驗的大廚金生，曾孭住背囊到新疆大小餐館學廚藝，喺度絕對食到純正新疆風味。
重量級塞外風味香烤羊架$108/8支
入口新疆1歲草原小羊，以紅酒、茴香及新疆香料醃2日，連骨都入味，康華話：「怕羊陣羶味，但呢隻羊架只感羊肉味重！」一般大餐廳食4支羊架都上$368！呢度8支只賣$108，好抵食！
新疆古法香酥小羊腿$62
一樣使用新疆小羊腿，以古法先蒸後焗將肉汁鎖緊；入口羊味重唔羶，面撒麵包糠及椰茸，外脆內嫩滑，肉身有口感。
吐魯番金瓜爆蒜香牛柳絲$60
金瓜者，哈密瓜也！加燈龍椒、腰果、蒜片香辣齊炒，份外惹味！至於與哈密瓜同食，大增其Juicy口感：「甜住辣！好有特色」。
雲軒居過橋緣 蒜泥白肉薄刀工
街坊叫筆者必試雲軒居，除咗老闆王韋奇係20多年雲南師傅外，一手薄刀工蒜泥白肉，連金至尊老闆都常為座上客，仲大讚好味過好多香港名食府！「我做嘅雲南菜，除咗少油、少鹹之外，味道完全正宗，始終香港天氣不比雲南咁凍，咁煮會健康好多！」
過橋米線$30/套
過橋米線中的肉食要片得薄，放湯即熟先至啱！材料有豬膶、腩肉、腐皮、米線、生菜等10多種，$30已叫你食出排場。
蒜泥白肉$25
清水白肉點樣可以整到咁好味？奇哥話：「秘訣在刀工！」切得厚就口感唔好、薄就冇肉味；「另一要點是汁醬調校，蒜泥、辣椒、麻油、葱、雲南香料，重點是即叫即調，份量配合好重要！」
八寶七星汽鍋雞$300
呢個八寶七星汽鍋雞於剛過的06年，在全港300多間食店中奪得食神爭霸戰雞鴨鵝組金獎！以田七、當歸、天麻、杞子、紅棗、龍眼、陳皮等七星伴鮮雞，以汽鍋清燉3小時，蒸氣成湯剛滿即成，難度在火候控制；入口先感田七的甘苦，飲後當歸、田七的香氣再由肚回至喉頭，同一般汽鍋雞完全兩回事！
鬍鬚安火鍋菜館 另類特製打老邊
北帝街內著名食店，基本冇乜街客，每晚都係訂爆枱熟客！老闆鬍鬚安話：「喺度唔會搵到普通食材，我最鍾意簡單複雜化，所有龍蝦、大蜆等，我都會特別製過先上枱，咁樣先好味嘛！」
（前）魚露龍蝦$65（時價）
（後）辣酒海蝦$30
以魚露將龍蝦浸至入味，再放冰水，使蝦肉更彈牙！至於辣酒海蝦基本辣酒蝦製法一樣，放入打邊爐真係和味好多。
金華火腿花膠蟹煲$80
基本兩個人去淨食呢個鍋底都飽！花膠、杞子、淮山做底，感覺已極滋補：「選蟹一定要水蟹，因為湯底會出味啲，用嚟配海鮮打邊爐，味道最夾！」
睇路搵食
1.上海老正興飯店27600877
2.食軒26247008
3.家甜屋潤甜品館27152889
4.德昌魚蛋粉27113828
5.鬍鬚安火鍋菜館27627870
6.珍寶豆漿92788618
7.雲軒居過橋緣27607039
8.大漠27144483
9.鮮日之市場31881359
