幾年前肥仔K申請美國大學，買本PrincetonReview（與普林斯頓大學無關）睇吓，呢本書評論三百間美國最好大學與書院，並非平鋪直敍，只有數字及大學威水史，而係訪問過每間學校嘅學生，收集意見之後，再寫綜合評論，立論十分幽默抵死，例如邊一間大學最合追女仔，飲啤酒，係一間partyschool，又有講另一間大學最多兄弟會，玩新生唔使本。講到耶魯，就話學校一流，但校園所在地NewHaven係全美國最悶死人嘅地方，至於加州理工學院，就最適合「想攞諾貝爾獎而畀諾貝爾獎得獎人教導嘅學生。」無天才者請勿入讀。
學生評論學校，用意在於諷刺、風趣、抵死兼備，即使點名鬧其他大學，亦無傷大雅，大家玩吓啫。肥仔K後來到耶魯、哈佛、MIT、哥倫比亞等大學參觀（佢巡遊之後，一間都唔敢申請），見到耶魯學生鬧哈佛，MIT學生鬧哈佛，口號/字句印上T恤，但並非粗俗，隨街賣，覺得人哋好好玩，香港學生就比較守舊一啲嘞。
好嘞，上星期日（一月十四日）《明報》報道香港大學招待尖子，港大學生會刊物《學苑》列舉「最令港大驕傲的一百個原因」，有啲有紋有路，如「全球排名三十三，難怪入學多人爭」、「古色古香，最宜影相」、「著名校友一大籮，就連國父都讀過」、「學生英文夠流俐，開口唔會夾着脷」、「校長親民，競選連任」等等，另一啲就話港大好玩到極，如「住在沙宣，唔會寒酸」，「型男索女，有一大堆」、「熱褲短裙，青春逼人」、「學生富貴，喜歡消費」，相信中大畢業嘅王晶睇完，會撲入香港大學搵靚女拍片，希望培養另一個舒淇。
學生哥，玩乜都好啦，但美國傳統係大學校長、副校長識得避忌，唔會公開睇低其他大學。港大副校長資深顧問（洋人）史秉士就犯晒大忌，在尖子招待會上，點名中大排名五十，科大排名五十八，遠遠落在港大之後。莫講話呢份《泰晤士報》全球一百大學院排名嘅可信性，值得懷疑，即使有其權威性，史秉士自己秤自己咪得囉，使乜踩中大科大吖。咁嘅人做顧問，容乜易累親徐立之。