鍾意返深圳，為嘅都係付出少少，享受多多。今次跟團去玩一日，$28，食特色粥底火鍋連專人服侍，打邊爐連自己出手都慳番，做一晚皇帝。你實話：邊有咁筍！食之前要行晒全深圳嘅「購物點」，悶死有福都無命享。錯！全程純玩，周圍睇古城牆、花卉世界、寺廟祈福……行勻深圳靚景。想Shopping？食完飯自己行最新名店商場COCOpark喇。$28（另加導遊費$50），包埋晚飯，抵玩啦！
記者：劉昱蘭
攝影：何家亮
Models：Novy、Ivan（IntermediaGroup）
粥來張口蹺埋雙手
專人幫你放火鍋料、加粥水，只差未放埋入你個嘴度，並唔係單單為咗等你好似皇帝咁唔使郁，而係放火鍋材料先後有序咪亂嚟。先放海鮮後放肉。因為如果加咗肉先，海鮮就會滲入肉味，食唔到海鮮本身的清甜鮮味。清晒肉食，最後放冬菜滾1分鐘，加埋生菜絲同油炸鬼落個粥底，入口綿滑唔使講，一嗒，包含住各款火鍋料的味道，好豐富。所以話識食有序，嚟平價歎世界嘅團友，知點解可以咁好味就夠，唔使郁等食就得喇！個團$28（另加$50導遊費）即係$78，包兩餐。其中最抵係呢餐，因為自己幫襯齋係個粥底都要收你$28，再每碟餸另外計錢，𠵱家就包埋9碟餸。
食粥底火鍋，最正就係無咗麻辣火鍋或一般湯底火鍋的上火熱氣，因為粥本身就係清熱嘅。個粥嘅口感，喺每放完一樣配料，味道都有少少唔同咗，愈食愈鮮。仲有好正嘅就係，啲配料用粥滾過，就好似打咗一層芡咁樣，入口滑滑的又有少少米香，試過先知比一般湯底火鍋咁唔同。
為我哋加配料又攪吓粥底，每枱人客都有一位服務員，就算行開咗都好準時返埋嚟，食物絕不過熟，絕對好Service。
粥底先以鹹瘦肉煲3粒鐘，分別以3種米混合成各取所長，又香又起少少膠，仲加咗3種材料，發菜下火、紅棗補血香口、薑絲去腥驅寒，各有功效絕不兒戲。
$28包啲乜？
1）午餐火鍋宴包粥底同豬肉丸、三黃雞、鯪魚丸、魚皮餃、淮山、冬菇、生菜、炸油條、豬面肉9款鍋料及芽菜炒河，其餘想食就要自己加錢，如珍珠蠔$33碟、炭燒蠔$10/3隻。
2）周六、日出發$38/人，導遊費另加$50，包埋晚餐。
3）要自己搭車去羅湖關口集合同埋自費返港，深圳境內景點遊覽則有團隊冷氣巴士包晒。
德勝軒粥底火鍋名城
地址︰福田區東園路富豪大廈1樓
電話︰86-755-25988811
清遺城牆萬景樓
食完午餐繼續玩。綜觀睇花拜神咁多行程，其中以景點「萬景樓」最有特色，原本清朝有個古城牆留咗喺深圳，但去到文化大革命時期，玩破舊立新就乜都拆晒。近期古城外牆以青磚重新翻新，力保原貌原色，而且入面仿照嶺南私家園林格局建成公園。對比起北方的宮廷式真山真水的貴族氣派，嶺南高官貴族，則愛以人工假山、假水、亭台、樓閣作屋企後花園。深圳絕少古蹟，萬景樓算係區內少有的古代風情景點。
萬景樓
地址︰寶安區沙井鎮市民廣場對面
新開業COCOpark日式名牌商場
個團無乜Shopping點，等我推介畀你。熟深圳嘅都知，萬象城係走高檔次的舊場，同佢同一格局的COCOpark，上個月先開幕，一共5層，感覺似香港商場，食嘢有元綠、和民；睇戲有百老匯；珠寶有SWARORSKI；運動衫有Nike、adidas；超市就嚟有吉之島。行就幾舒服，但買嘢嘅價錢同香港差無幾。
and-b
地址︰COCOpark1樓L2S-042舖
COCOpark
地址︰福田區民田路福華三路交界
交通︰地鐵購物公園站出口
報團資料︰美食之旅
地址︰旺角彌敦道610號荷李活商業中心725室
其他行程：左炮台、女媧補天象、海上世界、銅牛象、鳳凰山鳳岩古寺、南山花卉世界（另包晚餐：金海迎春宴）
電話︰35425009