唔認指令踢斷對手隻腳<br>求驗客手記:禾諾克死性不改

唔認指令踢斷對手隻腳
求驗客手記:禾諾克死性不改

上周六英超球員個個好似食咗火藥咁,「燥底」非常,全日球證出示咗3張紅牌,而上季英冠大戰翻版,雷丁主場贏錫菲聯一場,球員唔止腳腳七注,更「掌掌到肉」,連教練席都大打出手,差啲觸發雙方大混戰呀!

雷丁助教笨人出手

查實場波戰情平淡如水,70分鐘雷丁已憑沙恩朗、廸拉告魯斯、史堤夫亨特各入一球,領先到3:0。稍後客軍追成1:3,對大局影響唔大。然而,賽事到54分鐘,雙方爭掟界外球時發生爭拗,錫菲聯翼鋒基利士比無啦啦整咗隻「寒冰掌」畀對方嘅史堤夫亨特嘆,即時被逐!
餘波未了,隔咗一陣,只見雷丁助教當尼斯,突然衝去隔離,以鬧帶打咁搵禾諾克算賬;而後者就笑笑口咁畀佢又推又撞,等待自己友將當尼斯拉開;驟眼睇就一奸一忠,但箇中起因值得同球迷噏多兩句。
原來,當尼斯「睇見」禾諾克好大動作咁做出「用腳踩落地」嘅姿勢,意即「踩斷佢哋對腳」,所以令雷丁教練席極為不滿。
一向麻煩多多的禾諾克否認挑起火頭:「佢(當尼斯)話我叫球員踩斷雷丁班友隻腳,簡直係廢話連篇;唔信我?可以問第4球證!」

「禾諾克曾試過做反V手勢、挑釁球迷、粗口贈球證等,惡行纍纍,並非善類,呢壇嘢如果足總插手,佢想甩身都幾難!」