前幾日，敏妮睇報紙有一則新聞，係講投資基金公會退休金委員會做嘅一項調查，根據個調查顯示，有兩成人認為200萬至500萬就可以過舒適嘅退休生活。敏妮將單新聞forward畀芝芝睇，佢問：「敏妮，200萬真係夠退休？」
500萬未必夠用
「睇吓你想過啲乜嘢退休生活啦！我之前睇《蘋果》理財版個信箱，有個讀者擁有二百幾萬資產，但由於希望退休後每個月仍然有兩萬蚊使，理財專家認為佢仲要一筆過拎180萬元投資，先至好退休。」
「敏妮，你有冇諗過退休呢個問題？」
「芝芝，雖然我哋仲咁後生，但退休可能比我哋預期早嚟到，所以一定要趁早為退休部署。」
「你諗住儲幾多錢退休？」
「冇一個實質金額，因為你可能預測到未來大概嘅通脹，但你有幾長命？年紀大咗之後每年要有幾多醫療開支？仲有好多突如其來嘅事，根本無法預計。所以我嘅退休資產除咗一層已經唔使再供嘅樓用嚟自住，同埋一啲長揸作收息，兼可以升值嘅股票，最重要係趁後生，學識投資技巧同竅門。當我退休時，仍然可以靠投資賺取收入。」
「你嘅退休資產裏面，好似冇計強積金（MPF）同保險。」
有樓有股唔使愁
「我嘅MPF組合全部投資港股基金，所以已經計入長揸股票裏面；保險我有買危疾同醫療保險，當我年紀大、機器壞時作為保障。至於我買嘅壽險，冇儲蓄成份，因為我覺得錢由我自己投資，回報會更高，年輕時買壽險，純粹係驚有乜『冬瓜豆腐』，爸爸媽媽會冇所依靠！」
「咁你個投資組合咪好大部份都係港股囉，唔怕風險太高咩？」
「港股本身有好多唔同sector，即使股災，都有股票逆市升，最重要係你識唔識揀，而且我冇話唔理市好市差都捕喺股市唔走，市況唔好，我可以減少投資，呢個時候，長揸收息嘅股票就為我提供recurrentincome。」
「好似啲大企業盤數咁，有投資收益，又有穩定嘅經常收益，就唔怕個市起起跌跌。」