早排改咗名叫「導演」嘅選美儍大姐，轉咗行反而仲活躍，30幾歲人精力仲勁過啲後生，夜夜爛蒲，喺蘭桂坊見到佢一啲都唔出奇。話說某個星期五晚，導演就同個中坑試新嘢蒲新場，呢個新私竇就喺中環陸羽隔籬，幾隱蔽吓，保安仲超嚴㖭，所有會員要影低張相，到門口望住個「芒」，就會check到你係唔係會員，冇得白撞。
嗰晚導演着到靚一靚蹺住個中坑去到呢個新場，雖然佢喺呢行冇人唔識佢，但係呢個新場唔係話指鼻哥就入得，門口啲大隻佬保安真係執正嚟做，話之你係明星定天后，一樣冇得傾，導演要吹住西北風食閉門羮，面都燶埋，見佢走又唔係，終於搭上搭話係乜水物水個friend，幾經辛苦先至入到去咋！
Textby關仁